مين فينا ما حس بيوم من الايام انه راسه رح ينفجر و عيونه رح تطلع من مكانهم؟ أكيد كلنا مرينا بهاي الحالة، في مقال اليوم رح نعرف معلومات أكثر عن الصداع، أنواعه وحالاته، وكيف ممكن نتعامل معه، كل هذا وأكثر ودائما بأسلوب ساحات المعرفة.
الدماغ مش هو مصدر الألم!
مبدئيا, خلينا نوضح هاي المعلومة المهمة, المخ أو الدماغ ما في مستقبلات ألم, يعني مستحيل يحس بالألم لو شو ما تعمل فيه, لهيك بعض جراحات الدماغ و المعروفة باسم “جراحات الدماغ الواعي – Awake Brain Surgery” بتتم باستخدام جرع محددة من العناصر المخدرة و بدون استخدام مسكنات الالام المعتادة في العمليات فبالتالي ممكن المريض يكون واعي أثناء العملية و يتذكرها.
طيب اذا مش الدماغ, من وين الألم؟
في عدة أنواع و مسببات للصداع, السبب إنه في عدة أعضاء و مناطق بترسل إشارات الألم الى الدماغ, و من ضمن هذه الأعضاء و المناطق:
- شبكة الخلايا العصبية في مقدمة و فروة الرأس
- بعض الخلايا العصبية في الوجه, الفم و الحلق
- بعض عضلات الوجه, الرقبة و الأكتاف
- الأوعية الدموية المحيطة بالدماغ من الأعلى و الأسفل
أقسام الصداع الرئيسية:
كل حالات الصداع و درجاتها بتنقسم لنوعين و هما الصداع الأولي و الصداع الثانوي, في هاي الصورة أهم الفروقات بينهم بشكل سريع:
بما انه معظم الحالات هي حالات صداع أولي, رح نستعرض أكثر 3 أنواع صداع أولي انتشاراً و هي الصداع التوتري, الصداع النصفي (الشقيقة) و الصداع العنقودي
الصداع التوتري
هو أكثر الأنواع انتشارا و اللي أكيد كلنا مر فيه, خلينا نشوف أهم المعلومات عن هذا النوع
السبب
بالرغم من انه الاكثر انتشارا الا انه العلماء و الباحثين ما قدروا لليوم انهم يحددوا مسببات هذا الصداع.
شو بُشعُر المصاب بهذا النوع من الصداع؟
الشخص بحس بضغط على الرأس من كل الاتجاهات, ممكن كمان يشعر بالضغط و الضيق في مقدمة الرأس بشكل أكبر, الرقبة أو عضلات الكتف العلوية كمان و بتستمر هذه الحالة من نص ساعة لساعات معدودة.
هل في أعراض ثانية مصاحبة؟
لا, هذا النوع بس بسَبب ألم واحد و هو منطقة تأثير الصداع فقط.
هل البيئة المحيطة بتلعب دور بزيادة حدة الصداع؟
لا, ممكن للشخص ممارسة حياته الطبيعية و يتحرك زي ما بدو و زي ما بقدر
شو ممكن أعمل في حالة الصداع التوتري؟
مع مرور الوقت بصير عند الشخص فكرة كافية عن العوامل اللي ممكن تحفز هذا النوع من الصداع واللي ممكن تكون نوع أكل معين, أشعة الشمس المباشرة لفتره طويلة أو حتى عطر, فالأفضل هو أن يتجنب الشخص مثل هذه المسببات و يتعامل مع الألم بهدوء.
الصداع النصفي (الشقيقة)
هذا النوع قوي و متعدد الأعراض و بمتد لفترة طويلة لذلك معروف عنه انه من أصعب الأنواع, بس هو في النهاية نوع من الأنواع الاولية, يعني ما في أمراض أو حالات طبية خطيرة بخفيها أو بدل عليها هذا الصداع.
السبب
مش محدد تماما, بعض العلماء بربطوه بتوسع و تضيق الأوعية الدموية , لكن مع مرور الوقت علماء اخرين بعتقدوا انه السبب وراثي و هذه هي الفرضية العلمية الحالية.
شو بكون شعور المصاب بهذا النوع من الصداع؟
المصاب بُشعُر بألم بشبه النبضات أو الومضات في جهة وحدة من الرأس
هل في أعراض ثانية مصاحبة؟
نعم, ممكن يشعر المصاب بالغثيان و في بعض الأوقات تقيؤ أو إستفراغ مع حساسية للضوء و الأصوات العالية في حالات ثانية. احيانا قبل الشقيقة بكون في اضطرابات و عدم وضوح في الرؤية على شكل أضواء بيضاء أو خطوط غير منتظمة في مجال الرؤية و في بعض الحالات كمان فقدان جزيء للرؤية.
شو ممكن أعمل في حالة الصداع النصفي؟
لحد الان و بالرغم من تقدم الأبحاث العلمية, ما في علاج نهائي للشقيقة, اللي ممكن يعمله الشخص هو تجنب المسببات الشخصية للصداع و انه تتوفر بيئة مناسبة للشخص عند نوبة الصداع, يعني يكون مرتاح و في مكان معتم و بدون إزعاج.
عامل مهم جداٌ للأشخاص اللي بعانوا من الشقيقة هو دعم الأهل و الأشخاص المقربين إلهم, و انهم يوفروا إلهم بيئة مناسبة للراحة و يفهموا طبيعة الوجع الي بحسوا فيه.
الصداع العنقودي
اللي بميز هذا النوع إنه مفاجئ و حاد و على الأغلب بكون في الليل قبل النوم, هذا النوع مش كثير منتشر إلا انه مؤلم لدرجة إنه الشخص بصحى من النوم بسبب الوجع.
السبب
كمان الباحثين ما قدروا يحددوا تماما شو هي المسببات, لكن لحد الان الدراسات بتربطه بالتغيرات في الساعة البيولوجية في جسم الانسان و احياناٌ بعوامل وراثية.
شو بكون شعور المصاب بهذا النوع من الصداع؟
وجع قوي و مزعج في جزء واحد من الرأس و خلف العين.
هل في أعراض ثانية مصاحبة؟
نعم, ممكن يتورم جفن المصاب مع نزول دموع بشكل مستمر, أيضا مع هذا النوع من الصداع ممكن يصير سيلان و إنغلاق في الأنف.
شو ممكن أعمل في حالة الصداع العنقودي؟
الموضوع مش زي الشقيقة, يعني الشخص ممكن يمارس حياته بطبيعية و يتناول المسكنات و ما بكون في مشاكل, لكن بعض الناس ممكن تتحسس من الضوء أو الأصوات العالية.
خلينا نعمل مقارنة سريعة بين هذه الأنواع
متى لازم أشوف دكتور؟
زي ما شفنا قبل, معظم أوجاع الرأس أو الصداع هي أنواع أولية, يعني ما في خطر على صحة الشخص من وراها, لكن في بعض الحالات لازم تستشير دكتور فيها اذا صارت معك و هذه الحالات هي:
- لما يكون الصداع جزء من أعراض ثانية: يعني لما الشخص يعاني من أكثر من حالة مرضية مع الصداع, مثلا اذا كان الشخص بعاني من ارتفاع درجة الحرارة مع رقبة متصلبة و استفراغ مستمر و فوق هذه الأعراض كلها الشخص عنده صداع فهذا معناه انو الشخص عنده التهاب السحايا.
- لما الصداع يعرقل أو يمنع الشخص من ممارسة حياته اليومية و نشاطاته الطبيعية: اذا لاحظت تصاعد في شدة الألم أو انه تكرار أكثر من العادة أو اذا حسيت إنه الصداع بأثر على وظائفك الحيوية مثل ضعف أو فقدان الرؤية الكامل, مشاكل في الادراك و التنسيق, غثيان و سماع أصوات غربية أو مش موجودة, هاي مؤشرات بتجبرك انك تشوف دكتور.
- إذا الصداع صار بعد حادث أو اصابة مباشرة: اذا صرت تعانى من صداع مزمن بدأ بعد عمر الخمسين أو بعد التعرض لأي اصابة أو رضة قوية على الراس, لازم تشوف دكتور.
معلومة اضافية:
اذا زاد الشي عن حده انقلب ضده, هذا مثل من أمثالنا العربية و في نوع من أنواع الصداع بمثل تجسيد حرفي لهذا المثل و هو صداع الارتداد أو الصداع الناتج عن الافراط في تناول الأدوية المسكنة, شرح هذه الحالة ببساطة هو انه اذا بتستهلك مسكنات ألم بكثرة ( الكثرة بتعتمد على نوع المسكن, يعني كمثال البروفن – Ibuprofen اذا بتاخذ أكثر من 15 حبة الشهر ممكن تصير عند هذه الحالة), الجسم بدخل في حالة اسمها العلمي حلقة الارتداد و هذا النوع من الصداع بصير يتجدد كل ما يبدأ مفعول المسكن بالزوال فبصير الشخص مجبر إنه يرجع ياخد المسكن مرة ثانية.
الصداع مش سهل, لكن مع اتباع نظام حياة منتظم و تحديد مسببات الالم بتساعد حالك و من حولك كثير, و دائما استخدام الأدوية يكون عند الحاجة فقط و باعتدال لتجنب مشاكل أكبر.
خلي أسلوب حياتك صحي, خليك ايجابي, خليك شاكر دائماً
للرجوع لصفحة المواضيع الصحية, اضغظ على الشعار تحت
المصادر و المراجع
John Hopkins medicine - مركز جون هوبكنز للرعاية الطبية Mayo Clinic - مركز مايو كلينك للرعاية الطبية National Headache Foundation - المؤسسة الوطنية الامريكية للصداع The National Institute of Neurological Disorders and Stroke - المركز الوطني الأمريكي للأمراض العصبية و السكتات American Migraine Foundation- المؤسسة الامريكية للشقيقة
https://www.hopkinsmedicine.org/neurology_neurosurgery/centers_clinics/ionm/types/intraoperative-brain-mapping.html https://www.hopkinsmedicine.org/healthlibrary/conditions/adult/nervous_system_disorders/headache_85,p00784 https://headaches.org/resources/ https://www.mayoclinic.org/diseases-conditions/tension-headache/symptoms-causes/syc-20353977 https://www.davidwolfe.com/7-types-headaches-causes/ - Picture in Migraine section https://www.ninds.nih.gov/Disorders/All-Disorders/Migraine-Information-Page
https://www.mayoclinic.org/diseases-conditions/cluster-headache/symptoms-causes/syc-20352080 https://www.ninds.nih.gov/Disorders/Patient-Caregiver-Education/Hope-Through-Research/Headache-Hope-Through-Research https://www.astrogle.com/ayurveda/cluster-headache-natural-remedies.html - Picture in Cluster headache section https://www.pinterest.com/pin/532058143456128368/ Medication overuse headache picture https://americanmigrainefoundation.org/understanding-migraine/medication-overuse-headache/
