مرض ارتفاع ضغط الدم

موضوع ارتفاع ضغط الدم منتشر كثير، حتى ناخذ فكرة عن حجم الموضوع لازم نعرف انه حسب اخر الاحصائيات من منظمة الصحة العالمية، في بالعالم على الأقل مليار حالة إصابة بارتفاع ضغط الدم، يعني لو جمعنا كل المصابين في دولة وحدة بتكون الثالثة على العالم من ناحية عدد السكان بعد الصين والهند

في مقال الأسبوع رح نعرف أكثر عن هذا المرض اللي بسبب بشكل مباشر وفاة ملايين الناس و بفرض تغييرات بأسلوب حياة المصابين حتى يتفادوا تطور أو تدهور الحالة

شو هو ضغط الدم؟

خلينا نبدأ بالموضوع بالتدريج، عشان خلايا الجسم تعيش وتكون بحالة سليمة، لازمها اوكسجين ومغذيات وغيرها من الأمور، والدم هو الناقل الوحيد لهاي المواد في الجسم، يعني الدم لازم يوصل لكل خلايا الدم، وعشان يوصل محتاج عضلة القلب واللي بتنقبض وتنبسط عشان تحرك الدم في الجسم، وهذا هو الاشي هو اللي بشكل نبض الانسان واللي ممكن نحسه لما نحط ايدنا على الشرايين

مع كل نبضة من القلب الدم بندفع نتيجة هذا الضغط وبمشي في الجسم، وكل ما يمشي في الجسم رح ينقل هذا الضغط كمان للشرايين اللي بمر فيها، وهذا الضغط هو المعروض بضغط الدم


شو المشكلة في ارتفاع ضغط الدم؟

الموضوع بسيط جدا، لما يكون ضغط الدم قوي داخل الشريان هذا بادي انه يصير تشققات او شروخ بسيطة في الجدران الداخلية للشرايين، و هاي الشروخ هي احسن مكان تتجمع في الدهون و الكوليسترول السيء, و تجمعات الكوليسترول هاي بتعيق حركة الدم الطبيعية فبتالي بتحط جهد اكبر على عضلة القلب عشان تضخ الدم بشكل أقوى و كمان بتخلي الشخص عرضة لإصابة بالجلطات أكثرمن غيره

شو هي أعراض ارتفاع ضغط الدم؟

ارتفاع ضغط الدم بحد ذاته ما إله أعراض قوية وملحوظة زي باقي الأمراض، ولهيك مرض ضغط الدم معروف باسم ” القاتل الصامت”، في بعض الأحيان ممكن يعاني المصاب من صداع, ضيق في التنفس او نزف من الأنف لكن هذه الحالات بتصير فقط لما الضغط يرتفع بشكل كبيركثير, أما في الحالات الطبيعية ما بكون في أي أعراض جسدية ملحوظة

شو هي أسباب ارتفاع ضغط الدم؟

خلينا في البداية نوضح نقطة معينة، مرض ارتفاع ضغط الدم نوعين، الأول اسمه ارتفاع ضغط الدم الاولي والثاني اسمه ارتفاع ضغط الدم الثانوي. ارتفاع ضغط الدم الأولي معناه انه الحالة هاي موجودة بشكل منفصل وبحد ذاتها، يعني ما في مرض أو حالة ثانية مسببة الها، أما النوع الثانوي فهو بكون ارتفاع ضغط الدم نتيجة مرض أو خلل ثاني في جسم الانسان

مع انه في تقدم في التكنولوجيا الطبية والأبحاث، الا انه لحد الان ما في دراسات بتثبت مسببات ارتفاع ضغط الدم الاولي بشكل قاطع 100%, لكن اللي قدروا يحددوا هي عوامل ممكن تزيد خطر الإصابة بهذه الحالة، ومن هاي العوامل


العمر: مع التقدم في العمر، جدران الشرايين بتصير أسمك وصلبة أكثر وبالتالي بزيد ضغط الدم عليها


عوامل وراثية: حسب الدراسات فانه ضغط الدم مرتبط ببعض الجينات وحتى بعض التغييرات الجينية اللي ممكن تصير مع الانسان أثناء الحمل


الأصل والعرق: حسب الاحصائيات والدراسات، الناس من أصل افريقي، أوروبي متوسط أو اسيوي هم أكثر الناس اللي بتصير عندهم حالات ارتفاع ضغط الدم


نمط حياة غير صحي: على عكس العوامل السابقة اللي ما بتقدر تتحكم فيها، هذا الموضوع 100% في ايدك. حسب الدراسات والاحصائيات فانه أسلوب الحياة السيئ بأدي الى ارتفاع ضغط الدم، وأسلوب الحياة السيئ في زيادة الوزن، التدخين، قلة الحركة والنشاط، تناول الكحول، تناول كميات عالية من
الملح والصوديوم وكمان الضغوط النفسية اللي بتحطها على حالك


شو هي مضاعفات ومخاطر ارتفاع ضغط الدم؟

زي ما عرفنا قبل، ارتفاع ضغط الدم بأثر سلبا على صحة الشرايين واللي هي القنوات الرئيسة لنقل الدم من القلب لكل الجسم، يعني لما الشرايين بتضرر، كمية الدم اللي بتوصل للأعضاء بتتأثر، والضرر بزيد كلما ظلت الحالة بدون علاج لفترات أطول و من أشهر مضاعفات ارتفاع ضغط الدم


النوبة القلبية


النوبة القلبية بتصير لما الدم يبطل يوصل عضلة القلب و بالتالي القلب بوقف عن النبض، ارتفاع ضغط الدم بأثر على سلامة و صحة الشرايين المغذية للقلب و بترفع احتمالية حدوت النوبات القلبية

تضخم (انتفاخ) الشرايين


هاي الحالة بتصير لما جدران الشرايين تضعف، مع ضعفها و زيادة الضغط عليها من الدم بصير فيها انتفاخ أو توسع, و لما يزيد الضغط ممكن تنفجر هذه الشرايين و بالتالي نزيف مستمر حتى الموت أحيانا، هذا هو بالضبط اللي بصير في حالة السكتة الدماغية على سبيل المثال


فشل (قصور) القلب

لما بكون في ممانعة في دوران الدم في الجسم، القلب بضطر يعمل جهد أكبر عشان يوصل الدم لكل الجسم، هذا الجهد بأدي اللي تضخم في الجدار الخاجي لعضلة القلب وإذا استمر الموضوع لوقت أطول بأدي الى فشل عضلة القلب وتوقفها عن العمل

الخرف

في بعض أنواع الخرف بتنتج من قلة وصول الدم للدماغ نتيجة تضيق أو انسداد الشرايين مثل حالة ارتفاع ضغط الدم، و بتزيد نسبة الإصابة كلما زادت فترة ارتفاع ضغط الدم بدون علاج

ضعف وفشل كلوي

ارتفاع ضغط الدم بأثر على كمية الدم اللي بتوصل للكلية وبتصعب وتزيد جهد عملها

كيف أعرف انه عندي ارتفاع ضغط الدم؟

زي ما قلنا قبل، ارتفاع ضغط الدم بحد ذاته ما إله أعراض، هو موجود بصمت، بس ممكن نعمل فحص ضغط الدم كل فترة وفترة

شو هو فحص ضغط الدم؟

اختبار بسيط وما بحتاج لاي تدخل بالجسم وبتم من خلاله قياس الضغط الناتج عن اندفاع الدم في الشرايين، والنتيجة فيها رقمين، الرقم العالي أو الأول هو كمية الضغط لما القلب ينقبض (يعني لما الدم يطلع من القلب) والرقم القليل أو الثاني فهو الضغط لما القلب يرتاح (يعني لما القلب يرجع يعبي الدم) القراءة في الحالة الطبيعية هي 120\80 وإذا وصل ضغط الدم ل 140\90 هون بكون الشخص بعاني من حالة ارتفاع ضغط الدم، وأي قراءة بين هاي القراءات بتعتبر قراءات مرتفعة شوي ولازم الشخص ينتبه على أسلوب حياته ويراجع الطبيب


شو علاقة الملح بارتفاع الضغط؟


الملح كيميائيا بتكون من 40% صوديوم و60% كلور، والصوديوم بطبيعته بجذب المياه لعنده، ولما يكون في نسبة كبيرة من الصوديوم في الدم، بتزيد كمية المياه كمان، يعني يزيد حجم الدم في الدورة الدموية ولما يزيد الحجم رح يزيد ضغط الدم بشكل طبيعي، يعني باختصار، تقليل الملح بساعد في التقليل من ضغط الدم

بما أنه بنحكي عن الملح و تأثيره، مهم جدا نعرف أنه الصوديوم مش بس موجود بالملح، هو كمان موجود بالمعلبات و الأغذية المحفوظة الجاهزة مثل المرتديلا و اللحوم المعدلة

طيب شو تأثير انخفاض ضغط الدم؟

انخفاض ضغط الدم إله كمان تأثيرات صحية مختلفة على حياة الانسان الطبيعة وأهمها الدوخة والإغماء والشعور بانه الشخص مش قادر يوقف، هاي كلها نتيجة وصول كمية دم قليلة لأعضاء الجسم الحيوية وأهمها الدماغ بسبب انخفاض كمية الضغط الازمة لضخ الدم

شو علاقة ارتفاع الضغط بالسكري؟

في المقال الماضي تكلمنا عن السكري واضراره، السكري بضعف جدران الأوعية الدموية، فإذا الشخص مصاب بالسكري، هذا معناه انه الشرايين عنده أضعف وأي ارتفاع بضغط الدم رح يكون تأثيره أكبر وأخطر وعشان هيك لازم الانتباه والفحوصات الدورية



في نهاية المقال وكل مقال، الانتباه على الصحة وتغيرات الجسم اشي مهم جدا جدا، وما كل الأمراض مع الكشف المبكر والعلاج السليم ممكن ينتهي تأثرها علينا، المهم دايما نكون واعيين ومبادرين


خلي أسلوب حياتك صحي, خليك ايجابي, خليك شاكر دائماً

للرجوع لصفحة المواضيع الصحية, اضغط على الشعار تحت

لوغو ساحات المعرفة



المراجع:

منظمة الصحة العالمية

منظمة القلب الامريكية

عيادة مايو كلينك الامريكية – أوهايو

المنظمة الوطنية للقلب،الدم و الرئة الامريكية

https://www.heart.org/en/news/2018/05/01/more-than-100-million-americans-have-high-blood-pressure-aha-says

https://www.who.int/gho/ncd/risk_factors/blood_pressure_prevalence_text/en/

https://www.heart.org/en/health-topics/high-blood-pressure/the-facts-about-high-blood-pressure

https://www.mayoclinic.org/diseases-conditions/high-blood-pressure/symptoms-causes/syc-20373410

https://www.heart.org/en/health-topics/high-blood-pressure/why-high-blood-pressure-is-a-silent-killer/know-your-risk-factors-for-high-blood-pressure

https://www.nhlbi.nih.gov/health-topics/high-blood-pressure

https://www.heart.org/-/media/data-import/downloadables/pe-abh-why-should-i-limit-sodium-ucm_300625.pdf?la=en&hash=0711AFDF8D6811CD1D1F54C95D45A597F3A6D644

Images from:

https://img.webmd.com/dtmcms/live/webmd/consumer_assets/site_images/articles/health_tools/heart_attack_101_slideshow/getty_rm_illustration_of_heart_attack.jpg

https://img.webmd.com/dtmcms/live/webmd/consumer_assets/site_images/article_thumbnails/slideshows/understanding_stroke_slideshow/650x350_understanding_stroke_slideshow.jpg

https://www.mayoclinic.org/-/media/kcms/gbs/patient-consumer/images/2013/11/15/17/41/ds00061_-ds00519_im04248_mcdc7_enlargedheartthu_jpg.jpg


اترك تعليقاً

لن يتم نشر عنوان بريدك الإلكتروني.